من وإحنا صغيرين دايما أهلنا ومدرسينا في المدارس يوصونا بالنظافة .. كلنا تربينا على أحاديث نبوية وآيات قرآنية توصينا بالنظافة في كل ما فينا وحولنا من منازلنا وبلدنا وحتى صغائر صغائر نظافتنا الشخصية .. كل ده جميل ومأعتقدش إنك مختلف معايا في أي جزء من اللي فات ,, وحتى لو مش مسلم برضه هانفضل متفقين على أهمية الموضوع صحيا وإنسانيا ..
الإسبوع الماضي كنت راجع من الرياض على خطوط مصر للطيران في أجازة لمدة إسبوع في القاهرة ,, بعد ما الطائرة نزلت المطار وبدأ الركاب كلهم ينزلوا فوجئت بكمية فضلات الأكل والورق اللي مرمي تحت كراسي الطيارة !! أيوة الطيارة !!! الموضوع بجد حسيت إنه كان ظاهرة بين معظم الركاب ! لثواني حسيت إنهم متفقين على كدة !! معرفتش الحقيقة أفسر الموقف تفسير منطقي يرضيني على الأقل وأنا نازل ! لكن للأسف ملقتش ..
.. على الهامش .. قبل نزولنا من الطائرة أعلنت المضيفة الجوية عن رش مبيد للوقاية من الأمراض اللي منتشرة الأيام دي .. بصرف النظر عن اللفظ وعن إنها كانت ممكن تستخدم لفظ مطهر أو دواء أو علاج .. لكن كان رد فعل أحد الركاب في الكرسي ورائي .. وهو : هو إحنا صراصير ؟؟! …. هو ليه إحنا لازم نعلق تعليقات ملهاش لزمة ؟ مهما كان ده كان وقاية لصحة كل الركاب .. ولا إحنا لو بطلنا نعلق نموت؟!
من فترة أيضا في فترة الحج الماضي لما كنا في الحرم المكي ,, نفس الموقف بس بشكل أوسع و أفظع .. كمية فضلات أكل و قمامة مرمية على الأرض .. جوة الحرم المكي .. أيوة تاني .. جوة الحرم المكي .. إنت متخيل الموقف؟ المنظر الحقيقة تحول إلى مزبلة ! بدون مراعاة لقدسية المكان بدون مراعاة لقدسية الموقف والتوقيت ! اللي حسن الموقف شوية إن إدارة المسجد كانوا عاملين حسابهم وكانهم إتعودوا على المواقف دي وبطريقة سريعة بيتم مسح وتنظيف المكان ده .. ده كان في الحرم المكي ,, لو روحت مِنى أو مذدلفة عشان تقضي فيهم الوقت الأكبر في شعائر الحج لك أن تتخيل الموقف إذا كان الوقت الأصغر بتقضيه في الحرم المكي يبقى المكان اللي بتقضي فيه الوقت الأكبر بيكون منظره إزاي ! فيها أيه بس لو كل واحد من الملايين اللي كانت موجودة كان معاه كيس صغير يشيل فيه الفضلات دي زي ما هو حريص على إنه يحتفظ بأمواله وطعامه وكمان الهاتف المحمول الخاص بيه؟ يمكن الواحد من دول مش مهتم بنظافته الشخصية ولا بنظافة بيته ,, بس إن كان كدة على الأقل هو حر ,, لكن مش من حقه إطلاقا إنه يقوم بالفعل ده على بعد سنتيمترات خارج بيته ..
مش هنسى إني فضلت أقول لما شوفت المنظر ده ,, دي مكة يا ناس !!! دي مكة !!!!

مدونة الديكاميرون .. عن الأدب و الكتابة والفلسفة والفنون

Advertisements