منذ 12 يوم تقريبا عدت مجددا لإستكمال دراستى لشهادة MCSD .. وطبعا ده هو السبب اللى خلانى مقل فى الكتابة فى الفترة اللى فاتت .. لكن النهاردة قبل ما أبدأ مذاكرة قررت أكتبلكم 🙂 ..
أكيد اللى درسوا دورات فى البرمجة أو المجالات المشابهة عارفين الجهد اللى لازم يتبذل فى المذاكرة والتدريب على البرامج وأفكار البرامج والمشاريع وما إلى ذلك .. لكن ومع ذلك المتعة غير منتهية !! 🙂 .. رغم إنى اليومين دول أحيانا لما بغمض عينى بشوف أكواد وحروف إنجليزية وعلامات ترقيم .. طبعا من كتر النظر لشاشة الكمبيوتر .. ويمكن مش ده السبب الوحيد .. يمكن السبب لإنى ممكن شايف الأكواد دى جوة عقلى مش مجرد كلام على شاشة !! وده اللى خلانى أتخيل السماء تمطر أكواد برمجية أو ما يسميه المؤلفين (الوحي) .. أجمل حاجة بجد إنك تكون بتدرس وبتشتغل فى شىء إنت بتعشقه بكل حواسك .. تعيش معاه .. بتقضى معظم وقتك معاه .. أو على حد تعبير المدرب اللى بيدرسلنا .. ناس بتاخد الكيبورد معاها فى السرير وهى نايمة 🙂 ..
———————
فرصة بمناسبة البوست دى إنى أحل التاج اللى مرره ليا مبرمج حر ..

أحب شخص لقلبك في الدنيا؟
والدتى , والدى , أختى (تقدروا تعتبروهم شخص واحد)

انسان مستعد تضحي بحياتك – ركز فى كلمة حياتك – عشانه؟
أكيد هو الشخص اللى فى الأجابة الأولى .. وأى شخص يكون يستاهل فعلا إنى أضحى بحياته عشانه .. مش هاتردد..

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
أعوذ بالله .. أيه الكراهية دى كلها ؟؟ 🙂 الحمد لله موصلتش إنى أكره حد بالطريقة دى .. اللهم أدمها نعمة ..

ما هو اسم اجمل كتاب كتبه بشر قراته ومحتفظ به حتي الان؟
الحقيقة أكيد بالنسبالى أكتر من كتاب .. لكن أول كتاب جيه فى ذاكرتى وأنا بكتب الرد .. كتب “فى صالون العقاد” للكاتب أنيس منصور ..

اسم كتاب كتبه بشر برضة- انت متعلق بيه وبتقرأه كل فترة؟
نفس الإجابة اللى فاتت ..

اهم جهاز منزلى انت متعلق بيه او بتستخدمه كتير؟
الكميوتر (أينشتاين 1,1) سابقا Amiga حاليا ..

مكان تحس بالراحة عندما تدخله؟
غرفتى ,, المكتبة ..

شىء تحس بالراحة النفسية عندما تنظر اليه؟
البحر ,, السماء ..

مكان تحس فيه بالحنين الى شىء لا تدرى ماهو و ذكريات جارفة الى لاشىء؟
مدينة مونبلييه مسقط رأسى .. إحساس غريب شدنى لهذا المكان .. على الرغم أنى لم أعش فيها طويلا .. ولكنها كما قال السؤال تماما .. ذكريات جارفة إلى لا شىء !!

اجمل مدينة زرتها داخل مصر ؟
إسكندرية طبعا !!

أجمل مكان طبيعي رأيته داخل مصر ؟
النيل وقت الشروق ..

شخصية كارتونية بتحبه؟
فكرتنى بالذى مضى (ماري منيب) 🙂 .. كابتن ماجد و كعبول ..

نوع هاتفك المحمول؟
نوكيا (سؤال غريب)..

سرعة بروسيسور جهازك؟
1,66 جيجا هرتز ..

حجم ذاكرة –هارد- جهازك؟
512 – 160 جيجا بايت ..

المساحة التى تشغلها المواد الاسلامية على جهازك؟
سؤال غريب برضه !!

نفس المساحة السالف ذكرها فى قلبك -الاجابة لنفسك عشان الرياء يا اخواننا -؟
الإجابة فى السؤال نفسه !!

أهم هدف انت واضعه لحياتك الآن؟
أن أكون إلى الله أقرب ,, أن أكون مبرمج متميز (ده حاليا) ..

مواصفات فتاة الأحلام بالنسبة لك؟
أولا ملتزمة بأوامر الله سبحانه وتعالى .. تقدر ظروف عملي وحياتى .. تقدر أن هناك زوجة اخرى (الكمبيوتر ) وتحرص على راحتها 🙂 .. هادئة ..

صف ما يأتى:شعورك لما بتسمع كلمة مصر ؟
أتذكر قصيدة مصر تتحدث عن نفسها .. مع قشعريرة باردة تسرى فى البدن ..

شعورك لما بتسمع كلام عن اليهود؟
أتذكر إخواننا فى فلسطين .. وكيف أننا نقف أمام ما يحدث كالمتفرجين .. بل أدنى من ذلك !!

شعورك لما بتشوف ظابط شرطة؟
عادي !!

شعورك لما بتشوف الكناس العجوز فى الطريق؟
أفكر فى أبنائه الذين أتخيلهم كبار .. وكيف أنهم تاركونه يعمل هذا العمل الشاق بالنسبة له !! طبعا الأمر لا يخلى من أفكار بعيدة تماما عن الموقف بصنع ألة كنس متصلة بالإنترنت لإراحة الرجل 🙂 ..

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
أتمنى أن يكون قلبه مثل مظهره .. والقرآن فى قلبه وعقله وحياته وليس فى يده فقط ..

احساس يراودك فى اشارة مرور مغلقة بسبب مسئول كبير؟
فى البداية وخاصة إذا كنا فى فصل الشتاء .. (أذكر نفسى) بأن المسؤل من الممكن أن يكون لديه مواعيد مهمة أو واجبات يجب عليه أن يقضيها لحل مشاكل الناس .. ثم يتحول بعد ذلك .. وخاصة إذا كنا فى الصيف إلى سؤال .. هل تحتاج سيارة المسؤول كل هذا الوقت لتمر عبر شارع ؟؟؟!!!

جه وقت تمرير التاج للأخرين 🙂 ..
متشرد في بلاد العجائب
محمد
عُلا .. ادعو الله أن يخفف عنك همومك ..
تاموراي
الأخ مجهول

مدونة الديكاميرون .. عن الأدب و الكتابة والفلسفة والفنون

Advertisements