وأخيرا Linux بدون إصابات !!
وأخيرا ولله الحمد .. ومع دقات الساعة الـ 9 صباحا بعد سهرة شاقة وبعد الشد والجذب .. تمكنت من تثبيت توزيعةLinux Kubuntu والتى تحدثت عنها فى البوست السابق .. ولكن الجديد هنا أنها تمت بدون أى إصابات والحمد لله
.. ولمعرفة قصة الإصابات مع اللينكس معى يجب أن أرجع بالذاكرة معكم لــ 3 سنوات تقريبا حين قرأت عن فلسفة المصادر المفتوحة ونظام التشغيل لينكس وفكرت بإستخدامه .. وكانت البداية مع توزيعة Suse ولكنها طبعا كمشاكل مبتدىء عانيت الأمرين مع مشكلة اللغة العربية .. ويأست وتركته .. وعدت للويندوز .. وبعد عدة أشهر صادفت نسخة Mandriva وفكررت مجددا بالعودة .. ولكن هذه المرة كانت المشكلة مع تعريف كارت النتورك .. وبسبب تلك المشكلة لم أستطع الدخول على الإنترنت لحل المشاكل الموجودة .. وزاد على ذلك أنى بغلطة فى التنصيب فقدت كل البيانات الموجودة على جهازى … وقررت بعدها ألا أعود إلى اللينكس مرة أخرى .. وقلت فى نفسى إتركه لناسه …..وفى المرة الثالثة .. قرأت عن نسخة Ubuntu وطلبتها من الشركة ووصلتنى فعلا عبر البريد .. وقررت أن أكافىء الشركة على هذه الهدية .. بتجربة تنصيب النسخة على جهازى .. وكانت المأساة من جديد وضياع كل البيانات من على جهازى (يا إلهى!)..
وكانت المرة الرابعة .. بعد إقتناعى وتمهلى بأهمية الإنتقال .. والحرص مع كل خطوة .. بدأت فى تنصيب النظام للمرة الرابعة .. وكانت مع الأنيقة والجميلة Kubuntu والحمد لله تمت العملية بنجاح بدون خطأ كل مرة .. ولم تضيع أى من البيانات الحمد لله … وما أضحكنى جدا بعد ما إنتهيت وأكتشفت نجاحى فى تنصيب النظام .. أنى فوجئت بتحولى لفؤاد المهندس مرددا.. والله وإشتغلت,, إشتغلت .. وطلعت قماااااااش .. (مشهدا من فيلم عائلة زيزى .. وكان بعد نجاح فؤاد المهندس فى صنع ماكينة لتحويل القطن إلى قماش فى خطوة واحدة
) …
… مشكلة حالية أرجو المساعدة فيها …
أريد أن أعمل Amount لملفات Ntfs فهل هناك طريقة مشروحة لذلك؟؟!!
…دروس مستفادة…
1- لا تنتقل للينكس إلا إذا فعلا أردت الإنتقال !!
2- إختر جيدا التوزيعة المناسبة لك للإستخدام والشكل العام..
3- جرب البرامج المفتوحة المصدر المستخدمة فى اللينكس على نظام التشغيل الحالى بك حتى تحدث الألفة بينك وبينها قبل الإنتقال.
4- لا تثقل على نفسك مرة واحدة بالإنتقال .. وإبدأ بتنصيب اللينكس مع الويندوز لتتعود عليه.
5- إذا قررت البدأ فلا تبدأ إلا بعد أن تحدد مساحة كافية (أفضل 5 جيجا ) وتدعهم بلا تهيئة (أى بلا تهيئة ملفات Ntfs ولا Fat32)…
6- لا تهتم بما حدث معى بفقدان البيانات أكثر من مرة لأن الخطأ كان منى بالتسرع فى الخطوات أثناء عملية التنصيب..
…أهداف الفترة القادمة…
1- البدء فى التطوير تحت بيئة اللينكس بداية بـــ Mono
و Mono هى بيئة تطوير بديلة لل .Net فى نظام اللينكس..
2- وإذا تحدثنا عن التطوير فذلك فضلا عن التعود التام على بيئة النظام!!
3- البداية فى التعامل مع سطر الأوامر من داخل نظام اللينكس..
… خبر لفت إنتباهى اليوم …
مايكروسوفت تريد شراء محرك بحث ياهو بمبلغ 50 بليون دولار !!! مصنفة (لو تمت) بأكبر صفقة فى تاريخ تكنولوجيا المعلومات!!!
المصدر
… ملحوظة …
الصورة من موقع Life Hacker
أرجو أن تكون المصطلحات لا تسبب الغموض لبعضكم .. فإن شعرت بالرغبة فى معرفة معنى مصطلح معين فيما سبق .. فأخبرنى فقط ..
45تعليقات لحد الآن
اترك رد
مبروك يا كريم , ان نفسي من زمان اجرب ال linux بس معرفش اي حاجه عنه ,وأنت شجعتني بصراحة دلوقتي ..نستغلك بقى
السؤال الأول , هو ينفع يشتغل على ال PC العادي بتاعنا اللي شغال IBM ولا ده بيشتغل على اجهزة معينة زي نظام ال UNIX ؟
السؤال الثاني , هو ليه برامج موجودة تقوم بكل الأغراض؟ يعني مثلاً انا بشتغل على الفوتوشوب كتير , هل ليه نسخة فوتوشوب ولا ممكن استخدم الفوتوشوب العادي معاه؟
السؤال الثالث , هل اصلاً ليه نظام غير نظام البرامج اللي بتشتغل على الويندوز عامة , يعني كل الألعاب اللي عندي (انا مدمن ألعاب) أنسى أني العبها عليه؟
السؤال الرابع, التنصيب , لازم افرمت الهارد كله؟
السؤال الخامس , ازاي يبقى في بارتيشن مش فات ولا NTFS ?! ..
السؤال السادس , طهقت مني ولا لسه؟
معلش دوشتك
بالنسبة لمسألة ال mounting لل ntfs فالنظام يقوم بعمل auto mount لجميع اقسام hard disk سواء كانت بنظام fat32 او ntfs مع فارق انه يدعم fat32 قراءة وكتابة، ويدعم ntfs قراءة فقط، مع توفر Driver يدعي ntfs-3g لدعم الكتابة.
واانظمة GNU/Linux تعمل علي ال PC العادي، ، ومعظم اﻷجهزة عامة.
وبالنسبة للبرامج فله بدائل قوية جدا عن جميع البرامج التي تعمل علي windows , وايضا يستطيع تشغيل برامج windows من خلال برنامج wine او برامج virtual . وما ينطبق علي البرامج ينطبق علي اﻷلعاب.
بالنسبة لتثبيته فقط قم بازالة partition واحد فقط.
ولينوكس يستطيع التعرف والتعامل مع جميع انواع partitions كما ان له انظمة خاصة به وهي انظمة ملفات حيث انه يتعامل مع كل شيء علي انه ملف.
الف شكر يا محمد على الاجابات , طيب سؤال تاني معلش , هل هو خفيف على الكمبيوتر؟ يعني مش محتاج resources عالية وكده ؟
يعني انا مثلاً رامات 256 و معالج سيليرون 2.4 جيجا هرتز , هل ده هيبقى كويس عليه ولا هيبقى تقيل وكده؟
وهل من السهل اني اشيله وارجع للويندوز تاني لو احتجت لده؟
وكمان سؤال , دعمه للغة العربية هل هو كويس وكامل ولا لسه في عيوب وفي مواقع وايميلات مش هتظهر كويسة عندي؟
العفو يا محمد، جهازك يكفي وزيادة، واللينوكس عامة خفيف، ودعم اللغة العربية كامل، وشخصيا اقوم بأداء جميع أعمالي عليه ولا مشكلة ابدا، وتستطيع تثبيته جنبا الي جنب مع Windows، وتستطيع اﻹستغناء عن Windows كلية مثلي.
mohamed
أنا أسف جدا يا محمد ملحقتش أجاوب على أسألتك .. وأخى محمد مصطفي قام بالواجب على أكمل وجه
.. وأحب أقولك إنى حليت كل المشاكل اللى حضرتك ذكرتها .. فاضل بس الدعم الكامل لألعاب الويندوز وده لما أتأكد منه هاقولك إن شاء الله .. وبجد مش قادر أقولك على المتعة اللى فى النظام ده !! ببساطة .. تقدر تعتبر فيه السيد المطاع !! تقدر تغير وتعمل اللى إنت عايزه فى إطار شرعى وقانونى .. وأى سؤال تانى ياريت متترددش فى سؤاله ..
محمد مصطفي
جزاك الله خيرا أخى العزيز على إضافتك وإهتمامك .. تقبل تحياتى .. وإلى الأمام دائما ..
والله يا جماعة انا مش عارف أشكركم ازاي , بجد يا كريم انت شجعتني اوي بالتدوينة دي اني انزل ال Linux .. سؤالين اخيرين معلش دوشتكم معايا يا محمد أنت وكريم ..
انزل أنهي نسخة بالظبط؟ وازاي أستب من ال ISO ؟ احرقه على DVD ولا أعمل ايه بالظبط ؟
ربنا يخليكم للجهلة في ال Linux من أمثالي ..
ولا يهمك يا محمد .. وهى المدونات معمولة ليه ؟؟ عشان اليوميات وبس؟؟!! هى برضه من أهدفها .. -ولو عندى أنا على الأقل .. تبادل الخبرات –
نيجى لموضعنا الأساسى ..
انا عن نفسى شغال حاليا بـ Kubuntu وتقدر تحملها مجانا من النت .. إرحع البوست اللى فات وأدخل على اللينك وحمل على طول .. وهى صغيرة 700 ميجا أو أقل تقريبا يعنى مش محتاج DVD ..
النقطة اللى بعدها بقى اللى اللى هاتحددها إنت .. إنت عايز تحملها من داخل الويندوز كبرنامج إفتراضى .. وفى الحالة دى إمكانية الجهاز يتقاسمها النظامين !!
ولا تحملها كنظام تشغيل مستقل بذاته؟؟
إبدأ التحميل ورد عليا فى النقطة دى .. ونبدأ مع .. فى إنتظارك
.. وأعتذر لو إتأخرت فى الردود شوية ..
انا عندى suse و windows بس عاوزة اجرب Kubuntu لأن قرأت عنة مقالات جيدة , ان شاء الله أجربة ..دعواتك معانا .
FTM
وجهة نظرى أن Kubuntu افضل وأسهل وأكثر تحكما للمستخدم من Suse و Windows على السواء ..فى إنتظار تفاصيل تجربتك ..
ملحوطة للجميع بعد نجاح عملية تثبيت Kubuntu من يريد شرح أى نقطة بالصور يطلب .. وإن شاء الله نقدر نقوم بتنصيبه بدون أى مشاكل…
احم , الف شكر يا باشا على تعبك معايا , انا مش عارف اثبت لينوكس كبرنامج افتراضي ولا لأ؟ انا بفكر اشيل الويندوز خالص عشان انزل على نضافة , انا بنزل ال kubuntu وانا بكتب التعليق ده يا باشا ..
مادام كده يبقى اكيد هحتاج اني انسخ ال iso على اسطوانة صح؟
قولي بقى الخطوات والغلطات لالي انت عملتها عشان اتفاداها عشان مش عايز اضيع الحاجات اللي على الهارد عشان مهمة اوي ..
يا مدلعنا يا مهنينا
خلاص يا كريم نزلت نسخة kubunto مش ubunto ال iso اللي نزلتها خلاص هي kubuntu-7.04-desktop-i386.iso
انا ايدي بتاكلني
احم معلش انا عامل دوشة على الصبح ..
انا مش لاقي أي driver للماذر بورد بتاعتي ل kubuntu ..
انا شغال ب gigabyte 848 p
مش عارف اجيبهم منين !
mohamed
صباح ال Kubuntu
على فكرة إنت فى الغالب مش هتحتاج تعريفات .. أنا لما جيت نزلتها على جهازى مطلبش منى ولا تعريف ..
1- إنت حرقت الIso على سى دى ولا لسة؟؟
2- عندك برامج تقسيم هارد زى Partition Magic ؟؟
فى إنتظارك..
همم لسه محرقتش على CD كمان ربع ساعه هنزل اجيب واحرق ,برامج تقسيم هارد , عندي بارتيشن ماجيك بس مجربتوش .. قولي الخطوات وانا جاهز
mohamed
أنا عملتلك شرح بسيط بالصور لطريقة تهيئة الهارد عن طريق برنامج Partition Magic .. شوفه .. وإحرق ال Iso على سى دى .. ونفذ خطوات الشرح ..
ونبدأ فى الخطوة اللى بعدها .. فى إنتظارك ..
رابط تحميل الشرح
نزلت الشرح ومشيت بالخطوات الهارد بتاعي كله البارتيشن اللي فيه باظوا !
كل شيء راح
مفيش غير ال C و ال D بس اللي موجودين ..
انا هموت بحسرتي
هحاول اتصرف اي حاجه ..
إنت أكيد مسيبتش التقسيم يكمل للأخر !!! أنا لما قولت إن بياناتى ضاعت قبل كدة كانت من نفس المشكلة !! كنسلت التقسيم من النص !! أنا مش عارف أقولك أيه الحقيقة !!أنا الخطوات دى هى اللى أنا عملتها فى جهازى .. ومفيش أى خطوة فيهم ممكن تضيع الداتا !!
انا سيبت الكمبيوتر يعمل التقسيم وروحت اتفرج على التليفزيون
ورجعت لقيته عمل ريستارت ..
الوضع كالتالي دلوقتي , لما افتح my computer مفيش غير ال C و ال D بيفتحوا الباقي نوعها RAW ومساحتها صفر و كل ما اضغط عليهم بيقولي drive is not formatted do you want to format it ?
بس الغريب اني لما بفتح البارتيشين ماجيك بيقرا الدرايفات عادي كأنها لسه موجودة بنفس احجامها واساميها العادية ..
مفيش حل ارجع بيه البيانات
تهانينا أخي الكريم كريم باشا .. وألف مبروك
ما شاء الله عليكم استطيعكم أن تستغنوا عن نظام ويندوز بكل هذة السرعة
كام سؤال على السريع يا إخواني الكرام
هل مدمج مع النظام جدار ناري؟ بالنسبة لمكافح الفيروسات؟ اللذي أعرفه أن هناك إصدارة من شركة كاسبرسكي من مكافح الفيروسات لنظام لينوكس .. هل أنت مركب الإصدارة دي ولا لاقيت برنامج أخر؟
بارك الله فيك أخي الفاضل
شكراً لك أخوي كريم على تشجيعك
وعندي سؤال
لو حبيت استخدم اللينكس جنب لجنب مع الويندوز هل ضروري أعمل تهيئة للهارديسك ؟
وأيش الخطوات اللي استخدمها للتنصيب ؟
هي قفلت معايا يا كريم , هنزل لينوكس يعني هنزله , انا فاضل عندي شغال 2 بارتيشين , ال C واللي انا هحط عليه اللينوكس وده مساحته 6 جيجا بايت , وال D وعليه ال XP وانا هفرمته اصلاً بعد ما انزل ال kubuntu قولي الخطوات اللي بعد كده ايه ؟
أعتذر منكم يا جماعة على التأخير .. بكرة إن شاء الله هابدأ أحضرلكم الشرح بالصور ونمشى مع بعض خطوة خطوة .. ياريت مكنش دايقتكم بالتأخير ده
..
انا مقدرتش اصبر يا كريم بصراحة , انا بكلمك دلوقتي من KUBUNTU تحيا جمهورية البرمجيات الحرة , وبالمناسبة انا رجعت البارتيشنات اللي راحت بكل اللي عليها , ونزلت ال kubuntu من غير أي مشاكل
المشكلة الوحيدة بس في الفونتات العربي , بتظهر عندي بعض الفونتات الحروف العربي بعيدة عن بعض مش متوصلة ببعض ..
بس كده
اول حاجه اكتبها بالkubuntu
الف شكر يا باشا
الموضوع فعلا جامد يا كيمو ومشوق
وفعلا انا خلاص بدات اظبط حسابتى عشان اشتغل بلنيكس
انتى اصلا محمسنى من الفكره من قبل موضعيك اللى كتبتها هنا
mms911
للأسف خبرتى قليلة كما قرأت أخى العزيز بالنسبة للجدران النارية فى اللينكس .. ولكن لو وجدت حل سأرسل لك بإذن الله ..
أما بالنسبة للأنتى فيرس .. فبحسب معرفتى أن عدد فيروسات اللينكس لا تتعدى ال 100 فيرس .. والعهدة على الراوى !!
وساحاول تركيب أحدهم على أى حال .. وسأراسلك بالجديد إن شاء الله…
ماشي صح
نعم يا أخى يجب سواء فى تنصيب اللينكس وحده .. او مع الويندوز .. تقسيم جزء من الهارد .. وليس بالضرورة الهارد كله .. وأنا عندى أعدت تهيئة 5 جيجا فقط .. والباقى مازال يعمل بـ
Ntfs
وأول الخطوات هى التهيئة .. ولها شرح بالصور أرفقته فى مشاركتى السابقة .. بعد الإنتهاء منها راسلنى .. ونبدأ الخطوات بعدها ..
..نصيحة لتجنب المشاكل لقدر الله ..
حاول أن تأخذ نسخة إحتياطية من بياناتك قبل التثبيت منعا للمشاكل..
فى إنتظارك ..
mohamed
الحمد لله إنك أولا رجعت كل البيانات بتاعتك .. ثانيا .. أهلا بيك فى الجمهورية اللينكسية المتحدة
.. بالنسبة للفونت العربى .. واللى أتمنى إنك تكون حلتها أصلا وقت كتابة الرد ده 
..
من قايمة إضافة البرامج الجديدة إبحث عن كلمة font أو win font على ما أذكر .. هتلاقى الفونتات الخاصة بالويندوز كلها موجودة .. وشوف كمان برنامج إسمه wine ده تقدر تشغل بيه أكتر برامج الويندوز .. وأهلا بأول مرافق ليا فى رحلتى
riddick
شكرا يا عمرو على كلماتك الرقيقة .. وأتمنى إن رحلتك تتم بدون أى مشاكل
مبروك انتقال موفق
salamz all… linux at the beginnings has its diffeculties… its part of the learning process. and its always a good thing to have someone with experience just in case.
the most important thing is to be ready to learn…alot!
any way I was wondering if any of you know about live CDs/DVDs… I think its a great idea to try linux without making any adjustment to ur pc. just reboot from a cd or a DVD and you ll end up with a fully functioning linux OS that you can try… then reboot back to ur normal setup once done!
now each distro provide a live cd.. but I highly recommend knoppix
http://www.knoppix.org
RedMan
الله يبارك فيك .. نورت المدونة
..
tas
أنا جربت فعلا إستخدام Live Cd بس الحقيقة محستش إنها عملية !! ومفيش حاجة بتيجى بالسهل طبعا .. عشان كدة متوقع المتاعب اللى هاتحصل فى الأول
..
شكرا جزيلا على مشاركتك الجميلة..
يا كريم مقدرش اقول غير الف شكر انت اللي دخلتني العالم ده اصلاً , انا مشيت كويس في اللينوكس , اينعم لسه معرفش استخدم اي اوامر من اوامر ال konsole بس مش محتاجها اوي هنا في المرحلة دي , لسه قدام شوية , انا نزلت كتاب عنها وهقراه لما افضى شوية ان شاء الله ..
مشكلة الفونتات انا حليتها اني استخدمت فاير فوكس بدل konqueror وده حل معظم المشاكل بس لسه يعني , هجرب موضوع ال وين فونت ده .. وال wine ده انت نجدتني بيه عشان gimp ضعيف اوي بالنسبة للفوتوشوب .
موضوع ال live cd ده مش عملي خالص , بطييء جداً , واهلاك للسي دي روم والسي دي نفسه , انا معجب بال kubuntu بس ان شاء الله هحاول بس لما اخد على اللينوكس اني اجرب تنويعات تانية ان شاء الله ..
انا ماشي بالتجريب والتخريب هنا , امبارح نزلت لينوكس 3 مرات !! عشان عمال بيقع مني بس انا عارف ايه السبب وكده , ان شاء الله لما افضى شوية هبقى اكتب تدوينة عن تجربة الكوبونتو ..
شكراً كمان مرة يا باشا
mohamed
..
مفيش داعى للشكر .. أنا مبتدىء زيى زيك بالضبط !! وأفيد حاجة فعلا إننا نتعلم من المشاكل والمعوقات اللى بتواجهنا … ده بيدى دفعة طبعا غير إتقان اللى بتتعلمه .. لإن اللى بنتعلمه بالسهل بيروح بسرعة والعكس صحيح!!.. ياريت تكون مستمتع بالتجربة بتاعتك زى ما أنا مستمتع بيها ..
تقبل تحياتى .. وإلى الامام دائما
مبروك عليك الانتقال إلى العالم الحر – لينوكس حيساعدك كتير لأنه نظام تشغيل من المبرمجين إلى المبرمجين، مع تسهيله من المبرمجين ليستخدمه غير المبرمجين
اقترح عليك تدوين ملاحظاتك ومذكراتك عن حل مشاكل التحول البسيطة، وبعد فترة تضعها في كتاب إلكتروني، تحصد به الثواب من كل من تحول إلى هذا النظام بسببك
شبايك
الله يبارك فيك أخى شبايك .. طبعا أنا فى مرحلة التعلم الأن .. ونويت فعلا أن أدون أغلب المشاكل التى تواجهنى .. على الرغم من أن بعض الأخوة الذين هم أعلم منى قد إنتهوا من تأليف كتب وافية عن هذا الموضوع جزاهم الله خيرا .. ولكن الفكرة محل تنفيذ طالما وجدت ما أضيفه على ما فعله من قبلى ..
أشكرك على إقتراحاتك البنائة دائما .. وتقبل منى فائق الإحترام والتقدير ..
مع اني مش شغال حاليا بيه
)
نظرا للمشاكل اللي حصلت معايا كمبتدأ
وعدم صبري عليه
لكن انا ان شاء الله ناويله اللينوكس ده
ويا انا يا هو
انا هنزل الأبنتو العادي
بس انا لما انزله هشيل زفت الطين كريه الملايين
ابن ميكروزفت الضال : ويندوز (شبابيك)
بيقولك فيه مثل :
Jump into the shallow end ..you’ll learn to walk in water….
And jump into the deep end you’ll learn to swim (or swallow
يعني هو اللينوكس بس على الجهاز…No windows inside
انا اللي خلاني اسيبه اني كان الويندوز وهو البديل السهل
لسه موجود على الجهاز…لكن لو مكنش موجود كان الواحد هيبقى مجبر على اللينوكس انه يتعلمه
طولت عليكم
ولا طولت ولا حاجة يا تامر
وياريت تستخدم اللينكس بجد .. وياريت أى حاجة تقف معاك قولى يمكن نقدر نساعد بعض
تحياتى ليك يا صديقى العزيز
شكراااااااااااااااااااااا
انا قرات البوست ده بالصدفه وانا ابحث فى النت عن اضرار ومشاكل وحلول للينكس مع الفيروسات والتروجانات وﻻنى كنت من متعصبى مايكروسف ولم اكن اتخيل انى هغير النظام ده وبعد تجارب عديده منها المرير مع اول نسخه وبما انى مبتدا ومستخدم عادى فقد واجهتنى تقريبا نفس المشكل وافتكرت وانا بقرا ا البوست ده اللى حصل معايا وهو شبيه لحد كبير مع اللى حصل معاك ولكن اﻻن والحمدلله بعد تجارب عديده حوالى ست نسخ ماندريف بسى لينكس سام لينكس و استقريت على نسخه بى سى لينكس اعتقد انها اجمل مارايت بالنسبه لى كمبتدى من ناحيه السهوله والسرعه والجمال الشكلى واعتقد بدون مبالغه ان نسخ لينكس الجديده ومنها المانديف وبى سى لينكس ٢٠٠٧ تفوق الويندوز فيستا بمراحل كبيره و ان اللينكس اصبح اكثر سهوله عن زى قبل وانا مش هقف هنا انا هحاول اجرب نسخ تانيه ﻻنه عالم اكبر من الويندوز بكتير
بحر ..
أنا سعيد جدا بزيارتك .. وبتجربتك دى .. بس ياريت تزودنا بمعلومات أكتر عن نسخة بى سى لينكس2007 .. أو حتى إسمها الكامل .. أنا بحثت عن الإسم ده ومجابليش نتايج كافية ..
تقبل كامل شكرى وتقديرى ..
مرحبا
مشكور على الموضوع
كيف تتم عملية تنصيب لينكس متل الويندز ولا كيف اريد تنصيبه مع الويندوز
متطلبات الجهاز ماهي ذواكر سرعة المعالج ؟
بالنسبة للتعاريف كرت شاشة مودم كرت تيفي الخ…
ان لااستطيع تحميل لينكس من النت ماهي افضل توزيعة للمستخدم عادي
اريد اسم النسخة كاملا حتى اشتريها لو سمحت
على فكرة سرعة المعالج عندي بطيئة ربع كاش 1715
ذواكر 256 كرت شاشة128 عندي هاردين المزر بورد GIGA BYTE
ارجو الرد والاهتمام تحياتي
20.
السلام عليكم ورحمة الله وبركاته
بالامس تمكنت من تنزيل نظام 7.04 kubuntu على جهازى وهو يعمل بشكل جيد ولكن تواجهنى مشكلة .
حيث اننى لم اتمكن من استعراض الهارد ديسك مع العلم بان القرص الوحيد الذى ظهر هو ال c ولكن اسمه تغير الى hda اما باقى اجزاء الهارد ديسك مثل d e f فلا اجدها تماما وبحثت عنها كثيرا ولكن هذه الاجزاء تظهر عندما استخدم الويندوز فقط ارجو من اخوانى مساعدتى
Lea
السلام عليكم ورحمه الله وبركاته
كيف الاحوال ان شاء الله يكون الجميع بخير
اخوى انا الوقتى اعمل على نظام الوينوز
ولكن انا بمعنى اصح اتخنقت منه
ناس كتير قالت ليه انزل اللينكس ومن حوالى سنه ونص نزلته بس مش فاكر اسم النسخه ايه وكان مصيرى زيك بالضبط ضاعت كل بيناتى
المهم الوقتى انا عاوز انزل نسخه تكون حلوة يعنى افضل نسخه فى اللينكس
وحاجة اخيرة لو سمحت ممكن تقولى ايه الفرق بين الويندوز اكس بى واللينكس
اه اه نسيت انا اصلا لا يوجد عندى اى اسطوانات للينكس فكيف لى بالحصول على اسطوانه او كم سعرها ؟؟؟
thankssssssssssssssssssssssssss
مشكور كتير على البرنامج الحلو
اسعد الله اوقاتكم ياأخوان
انا اطلعت عالمدونة بتاعتكم واعجبتني فكرة تنصيب الينوكس وقمت فعلا بشراء
اسطوانة دي في دي عيها حزمة ( data )
لبرنامج لينوكس Fedora 7
وسويت لها نقل الى الهارديسك عن طريق الفلاش الناقل لانها دي في دي وحولتها
الى iso 2.7 Gb
وعندي السواقة CD بس
مشكتي الآن هي :
كيف احول الـ iso2.7Gb واقسمها الى iso 700Mb
علشان ابدا التنصيب ؟
$anchor$basketball Betting,final Four,final Four Betting,final Four Gambling,final Four Sports Book,final Four Sportsbook,march Madness,march Madness Betting,march Madness Gambling,march Madness Sports Book,march Madness Sportsbook,ncaa,ncaa Betting,…
$anchor$basketball Betting,final Four,final Four Betting,final Four Gambling,final Four Sports Book,final Four Sportsbook,march Madness,march Madness Betting,march Madness Gambling,march Madness Sports Book,march Madness Sportsbook,ncaa,ncaa Betting,nc…
السلام عليكم ورحمه الله وبركاته
كيف الاحوال ان شاء الله يكون الجميع بخير
كان البديل الأقوى والأفضل
هو LINUX