كرسى إعتراف صباحى من أحمد – مبرمج حر

جالس لا بيا ولا عليا .. أتصفح مواقع البرمجة فى الفترة الصباحية المعتادة.. وأبدأ فى الكتابة لصديقى أحمد
وفجأة
….
يصلنى تاج منه شخصيا .. واللى هو برده أحمد !!
ويحطنى على كرسى الإعتراف .. ويطلب منى أن أكتب 5 أشياء لا يعرفها عنى أحد
طبعا الموضوع صعب جدا ومحتاج مجهود شاق والعودة بشريط الذكريات ألاف السنين ولكن مش مشكلة.. احمد لو طلب لازم يجاب

نبدأ
1-وأنا فى 3 إبتدائى تقريبا كنت أول مرة أتفرج على مسلسل رأفت الهجان .. وكانت حلقة كان فيها رأفت الهجان(محمود عبد العزيز) بيخبى أوراق سرية عشان تتبعت للمخابرات المصرية فى كيس بلاستيك وحطهم فى سيفون بتاع تواليت .. فى حمام فى مطعم تقريبا … طلعت فى دماغى,, وروحت كاسر الحصالة وجايب تحويشة العمر وحطيتهم فى كيس بلاستيك وحطيتهم فى السيفون … بس مرحوش للمخابرات طبعا الحمد لله

2- فى تالتة ثانوى عام وكانت للأسف فترة توهان ولا مبالاة بحاجات كتير جدا .. كان عندى إمتحان مستوى رفيع طلعت فى دماغى أنا وواحد صاحبى (عمرو) إننا منروحش الإمتحان وندخل سنيما..وفعلا حصل وروحنا فيلم أجنبى فاشل جدا مش فاكر إسمه الحقيقة
وطبعا ندمت بعد كدة بس مكنش الندم على الإمتحان لإن هما كانوا درجة ولا إتنين مفرقوش معايا بعد كدة كتير ..لكن ندمت لإن الفيلم كان سىء جدا

3- وأنا فى 4 إبتدائى فى أجازة الصيف طقت فى دماغى إن حياتى مش عجبانى ولازم أستقل فكريا عشان ابدع وكنت ساعتها بألف قصص غريبة كدة ..وقولت لازم أسيب البيت وأعيش لوحدى… ومن ضمن التخطيطات قولت بلاش لوحدى وأختار واحد بس معايا ..وطبعا محدش يعرف عننا حاجة مستقبلا.. أقنعت واحد قريبى بالفكرة وهو كان أكبر منى بسنة ولميت شوية هدوم من عندى وروحنا بيت قريبى عشان نلم شوية من هدومه مكانش حد عندهم .. كان فيه مشكلة فى الكهربا عندهم ..فجينا نصلحها جارتهم تحت وهى قريبتنا برده.. إفتكرت إن فيه حرامية.. وإتصلت بوالد قريبى عشان يجى ..إضطرينا نخبى الموضوع ونقول إنى كنت جاى أبات عندهم اليوم ده..بعد كدة مش فاكر أيه اللى خلانى أنسى الفكرة الطائشة دى!!

4-فى 5 إبتدائى تقريبا قررت إنى أنشر مجلة وفيها القصص اللى كنت مألفها (واللى مش عارف هى راحت فين دلوقتى) وروحت وأنا فى سنى لدة لناس أصحاب مطابع والوحيد اللى مش عارف وافق ليه على الخطوة دى !! وافق إنه يتكفل بالموضوع!!وعملى فعلا إعلان وحطه على باب المكتبة بتاعته.. بس بعد كدة الراجل إبنه صغير ضاع .. وقفل المكتبة فترة كبيرة جدا
تفتكروا ليا علاقة باللى حصل ده؟؟

5-بحب النوم جدااا بجد ونفسى أبطل العادة دى .. وده اللى جعل بعض الألقاب تطلع عليا ..زى المومياء .. أبو موتة..صاحب التابوت

طبعا اللى فات ده كلام فى سركم ومحدش يعرف عنه حاجة
اما الخمسة اللى أبعتلهم التااااج ده

كبير المتشردين
مصعب الخير
علا
محمد طنة
سفيان العزيز

شجرة العائلة للغات البرمجة

شجرة العائلة للغات البرمجة بداية من الجد فورتران الكبير عام 1954 إلى الأن.. ومازال الإبن العربى المنتظر فى علم الله
!!
إضغط هنا

!!كبير المتشردين..مغلطش

فى البداية .. مكنتش أحب إنى أدخل فى مهاترات وكلام ميخصنيش .. لكن الحقيقة الموضوع والفكر أنا مؤمن بيه جدا ..ده غير إن الشخص أنا مؤمن بفكره جدا وهو فعلا من الشخصيات اللى أى مدون يتشرف بالقراءة ليهم….
ولو إنى شايف إنه أبعد ما يكون عن الإسم اللى إختاره لنفسه
!!
كبير المتشردين
كانت البداية فى إعلان التمرد
وبعدها الموضوع سبب كتابتى للبوست دى
اولا معجبنيش الحقيقة طريقة الرد التهكمية من الأخت شهروزة..
ثانيا ياريت تفهمونا بإستفاضة أيه معنى الحرية والمصداقية عندكم؟؟
وبمنطقكم .. طالما الحرية محفوظة يبقى إيه اللى يضايق ؟؟
حتى لو فيه بلاك ليست!!
والحرية دى مش بتفرض إن الأخرين يحترموا الرأى بدون تجريح ولا إستهذاء سواء ظاهر أو -من تحت لتحت-
أنا عارف إن البوست دى ممكن حد من هواة الدفاع عن الحرية المطلقة يقروها .. وطبعا هاينطلق الكلام .. ويهتف ورائهم المشجعين وهم بالألاف وبلا هوادة !!
ولكنها الحرية..
فعلمونا الحرية
لعلنا نتعلم!!
وفى الأخير لك يا كبير المتشردين منى كل الشكر والتقدير على موقفك الحاسم

الذين هاجروا

ما فى المقام لذى عقل وذى أدب من راحة فدع الأوطان واغترب
سافر تجد عوضا عمن تفارقه وانصب فإن لذيذ العيش فى النصب
أنى رأيت وقوف الماء يفسده إن سال طاب وإن لم يجر لم يطب
الأسد لولا فراق الغاب ما افترست والسهم لولا فراق القوس لم يصب
والشمس لو وقفت فى الفلك دائمة لملها الناس من عجم ومن عرب
والتبر كالترب ملقى فى أماكنه والعود فى أرضه نوع من الحطب
فـإن تـغرب هذا عز مطلبه وأن تـغرب ذاك عز كالـذهب

أبيات للإمام الشافعى رحمة الله عليه ..بصرف النظر عن أنها رائعة كعادته!! وجدتها حقا تحاكى فكرا وواقعا أنا مؤمن به .. فأنا مع الهجرة والسفر والتعلم وفتح أفاق جديدة لفكر الشخص .. وخبراته أيضا.. ولكن لا تدع تلك الفكرة تثبت فى رأسك عن أنى مع الهجرة المطلقة والجرى وراء العلم بلا هدف!! ماذا أفضل من تسافر وتتعلم وتبنى نفسك وأسرتك ومن ثم تعود إلى وطنك تعلم وتبنى وتفيد إخوانك وأخواتك فى كافة بلادنا؟؟
وفى الأخير .. إقرأوا كتاب الذين هاجرو للكاتب أنيس منصور وأنظروا لجانب الهجرة الأيجابى
..

الإسم المستعار .. وتغيير إسم المدونة

لماذا أكتب بإسم مستعار؟؟ سؤال سألته لنفسى .. لماذا نكتب بالأسماء المستعارة فى المواقع والمدونات والمنتديات ؟؟ مع العلم أنه من الممكن أن يكون القارىء يعرف الأسم الحقيقى ومع ذلك نكتب بإسم مستعار!! لم أجد إجابة مقنعة مني عن السبب ولذلك قررت .. تغيير إسم المدونة إلى مدونة كريم
وبالنسبة للكتابة فى بقية المدونات سيكون الإسم كذلك..وفى النهاية أعتذر إن كان تغيير إسم المدونة سيتسبب فى أى إزعاج

PhotoShopأكبر موقع على الإنترنت يحتوى على فرش لبرنامج

إذا كنت تحتاج لإضافة فرش أو مايسمى ب
“Brushes”
إلى البرنامج الشهير
“PhotoShop“
فهذا الموقع يحتوى على المئات منها

PS Brushes

التفاهة .. مرض لا يفنى

دار حوار قصير بينى وبين أحد الذين يهمنى أمرهم (للأسف)
عن المستقبل والطموحات وأشياء من هذا القبيل .. فسألته (ببراءة)عن أحلامه وطموحاته وما يتمنى فعله فى المستقبل البعيد والقريب فكان رده بكل جدية
عاوز أجيب موبايل !!!!
توقعت أن يكون الكلام على سبيل الفكاهة .. ولكنه أعاد الإجابة موضحا أنه هدفه فعلا …
وأخذ يحدثنى عن أن والده لا يريد أن يساعده ويجيبله الموبايل!!!!
فأخبرته أنى لا أقصد ماذا يريد أن يمتلك ولكن أسألك عن أحلامك وعملك ودراستك وقرائتك!!!قال لى ..بالنسبة للقراءة لا أحبها!!
بالنسبة للعمل لا أعرف.. بالنسبة للدراسة أهى ماشية..بالنسبة للأحلام .. أحب واحدة جميلة!!!!!!
فرديت عليه وأكلد أستشيط غضبا .. يا إبنى إزاى حد عاقل فى سنك يفكر بالسطحية دى؟؟ وإنت فى أخر سنة جامعة ولسة مش عارف هاتعمل أيه فى أى حاجة كدة؟؟؟
فوعدنى أن يفكر جديا فى مستقبله حتى لا يصدم بالحياة العملية الحقيقية وهكذا…..
ومر الوقت تحدثنا مؤخرا.. فسألته عن أخباره وعن جديد أفكاره ….
فكان الرد
باركلى
جيبت الموبايل
!!

!!عقارب الساعة لا تعود إلى الوراء

كثيرا ما نتذكر ماضينا وما حدث به .. كثيرا ما نفرح بلحظات مررنا بها .. وأخرى نتمنى لو لم نعشها ..
كثيرا ما نخطىء وأحيانا أكثر نندم على أخطائنا .. فمواقف الأخطاء كحافة حفرة بكلمة واحدة تسقط أو بكلمة واحدة تنجو .. ونعود ونندم فقد أخطأنا فعلا ولن يتغير شىء .. ونندم ولا ينصلح شىء..ونندم وربما نتعلم شىء!!
نخطىء فى حق أعز الناس علينا .. فهل يسامحونا؟؟ نخطىء فى حق أنفسنا فهل نسامحها؟؟
نتمنى أن يعود بنا الوقت لنصلح ما فسد .. ولكن للأسف عقارب الساعة لا تعود إلى الوراء!!
سامحنى يا من أخطأت فى حقك .. سامحينى يا نفسى على ظلمى لك..
أندم لعل الله يغفرلى..
ولن أتمنى أن أعود ثانية فهذا لن يحدث…
نصيحة لك.. لا تفكر بقلبك وعواطفك فالعواقب شنيعة!! فكر ألف مرة قبل أن تفعل أى شىء ..قبل أن تقول أى كلمة ..فقد تخطأ بفعل ..أو تفقد إنسانا يحبك حقا..بمجرد كلمة
..